Ja Dangan Si…?

Curita nian udah jadi buah beber kak urak diri’ nang tingal kak Puntianak. Banar gek ina’ curitanya ina’ bisa dibuktiatn. Mungkin hanya isu, tapi ade diri’ tele’ luas-luas memang dah manyak boh kamuda’ dara diri’ nang jadi nang bini nak banar. Lea ian curitanya...

Suatu ari ada urakng tuha kak kampokng nang nak nauan ahe-ahe. Anak daranya kuliah kak pasar – Puntianak – jak urakng dee. Mungkin karena barangkat man iman nang mepes samintara godaan manyak si anak dara koa ikut-ikutan man dangan. Ampahe gaya dangan, ia pun lea ak koa ugak.

Ia mulai’ kanal man kehidupan malam, mulai’ kanal kak diskotik, karaoke, ekstacy, sabu, hubungan bebas dan sabagainya. Marasa dah talanjur jantu’ kak dunia itapm, ia marasa idupnya nak baguna agik.

Makin ari makin nak takandali. Samintara keinginan untuk nikmati dunia malam, obat-obatan terlarang semakin kuat. Ahe daya urakng tuha nak mampu, kiriman pas-pasan untuk biaya idup sabulatn man mayar duit SPP.

Ponok curita, si anak nang cegak lea artis koa pun jadi bini piharaan urakng. Kamile lakinya palalu – ampa ja unte’ – ari koa lah atakng. Lama-lama si laki kontrak nian tadi mungkin bising ugak, masak makatn ikatn pada’ maan. Sakali-sakali lah maok makatn babotn, ikat atau manok. Ahe agik makin ari ia nele nang dara koa makin jahat, ina’ cegak agik. Lalu lah nang dara koa kana tingalatn di si laki koa tadi.

Ampeatn idup nang dara tadi dah makin nak tantu rudu. Kabutuhan makin manyak, sebab dah terbiasa jadi simpanan urakng. Akhernya jalatn satu-satunya jadi nang bini nak banar. Jam 10 sampe jam 02 malam ngayukngi urakng baduit kak karaoke. Ngarokok, nyocok beer, vodka sambil barenyah. Kaen roknya ponok kateleatn lonekng – atak – ja dangan kak tanah darat naun. Lea koa ugak bajunya. Sidi sampet...

Lama-lama ia pun dah jadi sidi. Dah nanak paduli kak omongan urakng kak kampokng. Si apak sabulatn sakali turut kak Puntianak ngawahi anak daranya. Satiap kali pulakng salalu kana bare’ duit.

Si apak nak curiga. Ia ngira anaknya karaja baik-baik maan. Ahe agik ya mikiri’ kuliah pastilah namu karaja nang baik, gaji ayak.

Saat ia pulakng kak kampokng, kamenakatnnya batanya.

”Ahe ba karaja anak kita’ koa pak udak”

Si apak pun nyahut.

”Ja Dangan si Lonte”

Rupanya ia pun ia ina’ nuan ahe nang dimaksud man kata koa.

Malam nian jam tiga dinihari. Mataku bai’ tidur, samintara dah nanak ba ide agik maok nulis ahe. Talintas kak pikiranku ontok nulisak curita nian. Tujuannya buke untuk maleceh sae pun. Tujuannya hanya sote, bahwa diri harus sama-sama marangi jukut koa, nyaga martabat urakng diri. Ade dee ja urakng tuha zaman nak pak Oevang Oeray, GP Djaong, Palaun Soeka man nang lain-lain ade ada namui urakng diri lea koa dibare ongkos pulakng kak kampokng. Ada samacam kasadaran ontok nyaga martabat bangsa dirik sama-sama. Ampeatn ari, makin luntur. Mungkin curita nian bisa jadi bahan renungan diri bersama.

Walaupun dah jam satangah ampat, tapi mataku masih baik tidur. Gajah, Jubata a...

Tuesday, December 18, 2007 |

0 komentar: